Një postim i drejtoreshës së Qendrës Shëndetësore të Bashkisë Klos, Nexhmie Dedolli është interesant. Ajo i shpreh publikisht mirënjohje punonjëses së palodhur, që sakrifikon çdo ditë për t’iu ndodhur pranë pacientëve në fshatrat e Klosit.
Dedolli shprehet teksa shkruan: “Mirënjohje infermiere Valmira Çollaku, punonjëse në fshatin Bërshi, e cila pavarësisht sfidave të punës dhe nënë e tre fëmijëve, u shërben çdo ditë pacientëve, duke udhëtuar një orë larg për në vendin e punës me mjetin e saj!”
Valmira udhëton çdo ditë me motorin e saj nga fshati Fullqet i Bashkisë Klos për në qendrën ku është emëruar. Në mot me shi, me borë, në temperatura të larta ajo është pranë banorëve të fshatit Bërshi.
Në vitin 2010 Valmira Çollaku ka përfunduar studimet për infermieri në Tiranë dhe është emëruar nga autoritetet e shëndetësisë në Bërshi, aty ku është lindur.
Ajo ka sfiduar gjithçka dhe me motorin e saj u shërben bashkëqytetarëve derë më derë, duke marrë shumë falenderime nga pacientët dhe drejtuesit e Qendrës Shëndetësore Klos.
