Viti i kaluar shënoi një sukses të madh për Rozana Radin dhe Sany Dimitrin, të cilët triumfuan në “Kënga Magjike 2024” me këngën “Akoma”. Performanca e tyre në skenë la përshtypjen e një partneriteti të fortë artistik dhe marrëdhëniesh të shkëlqyera mes tyre. Por, vetëm pak kohë pas fitores, gjithçka u përmbys dhe raportet e dyshes u ftohën në mënyrë drastike.
Rozana foli për herë të parë për arsyet që e çuan në ndërprerjen totale të komunikimit me Sanyn. Ajo e përshkroi ish-partnerin e saj muzikor si “mosmirënjohës” dhe u shpreh se mes tyre nuk ka mbetur më asnjë lloj kontakti.
“Unë nuk kam asnjë lloj komunikimi. Nuk më pëlqejnë njerëzit mosmirënjohës,” tha ajo.
Këngëtarja tregoi se konflikti lindi pasi emri dhe imazhi i saj u përdorën për të promovuar koncerte në të cilat ajo nuk ishte e ftuar dhe nuk merrte pjesë. Sipas saj, organizatorët kishin shitur bileta duke i bërë njerëzit të besonin se do ta dëgjonin live, gjë që e vuri artisten në një situatë delikate. “Dy muaj pasi dola nga Big Brother, pashë veten në një poster koncerti ku nuk merrja pjesë. Është përdorur emri im, njerëzit kanë prerë bileta për mua,” u shpreh Rozana.
Pas fjalëve të saj, reagimi i Sanyt nuk vonoi. Në një intervistë për emisionin “Living Day”, ai konfirmoi se ata nuk flasin më, por mohoi me vendosmëri që të jetë sjellë në mënyrë mosmirënjohëse.
“Kam dëgjuar që ka thënë që jam mosmirënjohës, por nuk mendoj se jam dhe as kam qenë. Këtë e tregojnë edhe postimet e mia, ku gjithmonë kam falenderuar çdo njeri që ka kontribuar,” tha ai.
‘Fotoja është publike dhe mund të përdoret nga kushdo. Nëse kjo çon në keqinterpretim, unë nuk di çfarë të them,” u shpreh ai.