Nënkryetar i Këshillit të Lartë të Prokurorisë, Alfred Balla i ftuar në emisionin “A show” u shpreh se ky institucion po punon mirë edhe pse ka pak muaj që është krijuar.
I pyetur për dosjet “184” dhe “339” nëse janë sabotuar apo jo, Balla dha detaje për këtë proces, ku shtoi ndër të tjera se hetimet në dosjen me numër ‘339’ kanë nisur hetimet për trafik droge dhe jo për blerje zgjedhjesh siç pretendohet në media apo nga diskursi i përgjithshëm politik dhe mediatik.
“Absolutisht jo. Media dhe publiku kanë disa informacione të vogla. Ajo dosja ‘339’ nuk ka filluar për vjedhje votash, por ka filluar për trafik droge dhe rastësisht janë kapur disa përgjime. Detyra e Prokurorisë është që të kap akuza kryesore dhe kjo çështje po shihet hap pas hapi. Ne kemi afatet tona procedurale. Afatet maksimale për një çështje janë dy vjet” tha Balla.
Edhe kryebashkiaku i Durrësit, Vangjush Dako është pjesë e kësaj dosje. Ai u mor në pyetje në Prokurori pak ditë më parë, lidhur me bisedat me anëtarë të bandës së Avdylajve.