Projekti i ri për kombëtaren shqiptare të futbollit me emra të rinj. Kjo është ajo që po synon të bëjë Edi Reja në dy vitet e parë të katërvjeçarit të ardhshëm kur planifikohet të jetë në stolin e pankinës kuqezi. Një nga këto emra të rinj duket se do të jetë Marash Kumbulla.
Trajneri i përfaqësueses shqiptare ka qenë sot i pranishëm në tribunën e stadiumit “Bentegodi” në Verona, për të parë në veprim mbrojtësin e talentuar në ndeshjen që skuadra e tij luajti ndaj Torinos, takimi u mbyll me shifrat 3-3 dhe Kumbulla ishte titullar në këtë sfidë, duke ndihmuar ekipin e tij që të merrte një pikë të rëndësishme në luftën për mbijetesë.
Kumbulla ka debutuar në ndeshjen kundër Moldavisë në eliminatoret e Europianit, duke luajtur pak minuta në fundin e saj, por për zgjedhje teknike e më pas dëmtimi, nuk pati mundësi më vonë që të zbrite në fushën e lojës. Duket se Reja e sheh atë pjesë të rëndësishme të planeve të tij për të ardhmen, duke planifikuar t’i bëjë një vend në prapavijën e përfaqësueses ku ka shumë konkurrencë pasi ka edhe emra të tjerë të njohur si Gjimshiti, Dermaku, Ismajli e Veseli.