Në plazhin e Shëngjinit këtë vit ka më pak pushues. Vëllezërit nga Kosova janë më të pakët në numër. Me siguri pandemia i ka penguar ato të vijnë nga matanë kufirit dhe detit për të pushuar në brigjet mahnitëse të Adriatikut. Edhe ata që udhëtojnë nga trojet shqiptare drejt Shëngjinit qëndrojnë më pak se vitet e kaluara. Vetëm në fundjavë ka një rritje të plazhistëve, kryesisht nga Laçi, Mirdita e Tirana.
Numri në rënie dallohet te boshatosja e hoteleve dhe shezllonëve buzë detit. Kur je një frekuentues i kahershëm i këtij plazhi kupton se këtë vit numri i pushuesve ka rënë me më shumë se 50 %. Pronarët e hoteleve ngrenë supet dhe të afrojnë çmime më të lira se sa vitet e mëparshme. Ndërkohë lokalet e shërbimit, sidomos ato që menaxhohen nga kosovarët ankohen se nuk kanë punë si vite më parë. As restorantet këtu nuk kanë punë si vitet e tjera. Janë të pakët frekuentuesit e tyre. Frika nga Covid 19 ndoshta i detyron të ushqehen nga banesat e marra me qira.
Tregëtarët ambulantë jo vetëm sfiliten nga mëngjesi në mbrëmje, por ato nuk sigurojnë të ardhura. Ulurijnë “hajde misra”, “kush do libra”, “erdhi tatuja”, “kush do fiq, nektarina, rrush”, por në të shumtën e rasteve nuk tregëtojnë gjë.
“Unë, thotë Luiza nga Shënkolli i Lezhës, prej shumë vitesh shes misra të pjekur në plazh. Më keq se sa këtë vit nuk ka bërë vaki. Ka ditë që nuk kam arritur të shes as 20 misra. Jam e sëmurë dhe dal çdo ditë. Dua të mbaj vendin e punës se ma zë tjetri dhe vitin që vjen nuk ku tregëtoj.”
Ajo dhe ambulantë të tjerë tregojnë kalvarin e vuajtjeve për të siguruar diçka nga sezoni veror, por këtë vit janë tejet të zhgënjyer, të mërzitur.
Ndërkohë mëngjesi dhe mbrëmja në Shëngjin afron tjetër. Pushuesit ecin e vrapojnë buzë detit. Kanë mësuar se jodi është shumë kurativ dhe bën mirë për shëndetin. Ndërkohë në mbrëmje kosovaret e veshura bukur lëvizin në shëtitoren e ndërtuar këtë vit nga bashkia, një investim që i ka dhënë tjetër imazh këtij plazhi.
Edhe pse këtë vit nuk pati pushues ndërtuesit vijojnë me intensitet të ngrenë pallate e objekte të tjera në shërbim të pushuesve.
