Bosnje-Hercegovina po merr ndihmë thelbësore nga e gjithë Evropa Qendrore dhe Lindore (EQL) si dhe nga BE, pasi ekipet e shpëtimit ndihmojnë në trajtimin e pasojave të përmbytjeve të rënda dhe rrëshqitjeve të dheut që goditën pjesë të mëdha të vendit të premten, centraleuropeantimes.com.
Shiu i rrëmbyeshëm ka bërë që lumenj të vërshojnë dhe fshatra të tëra të varrosen nën rrënoja në BH, duke lënë të paktën 18 të vdekur dhe shumë të tjerë të plagosur.
Autoritetet e BH deklaruan një gjendje fatkeqësie natyrore, pasi rrugët kryesore të transportit u ndërprenë në të gjithë vendin dhe po vazhdojnë kërkimin për të paktën 10 persona të zhdukur, duke përfshirë disa nga fshati Donja Jablanica, në jug të BH, i cili u përfshi pothuajse tërësisht nga një rrëshqitje gurësh. Qeveria e BH njoftoi fonde emergjente dhe vendosi njësi të ushtrisë për të ndihmuar në zonën e fatkeqësisë.
Zgjedhjet lokale të së dielës u shtynë në zonat e përmbytura të vendit. Zëvendëskryeministri i BH, Vojin Mijatoviç tha se “përparësia kryesore është shpëtimi i jetëve”. Në afërsi të Zllatës u shkatërrua gjithashtu, dhe tre vdekje janë konfirmuar jozyrtarisht në fshat. Shumë fshatra rreth Kiseljakut, Haxhiqit, Visokos, Fojnicës, Konjicit dhe Kreshevës janë gjithashtu të goditura keq apo edhe të shkëputura.
Njësitë e mbrojtjes civile, ekipet e Kryqit të Kuq dhe personeli i Shërbimit të Shpëtimit Malor po punojnë së bashku me ushtrinë për të arritur në zonat më të goditura. Ekipet kroate dhe serbe të shpëtimit mbërritën në BiH të dielën, ndërsa Sllovenia dërgoi një ekip të specializuar me qen kërkimi. Oferta shtesë ndihme kanë ardhur nga Mali i Zi, Maqedonia e Veriut, Polonia, Çekia dhe Turqia.
BH aktivizon mekanizmin e BE-së, bën thirrje për ndihmë rajonale. BH, e cila u bë një “vend kandidat” për pranimin në BE në 2022, aktivizoi ndërkohë Mekanizmin e Mbrojtjes Civile të BE-së (EUCPM) për të marrë ndihmë urgjente nga partnerët evropianë. Ministria e Sigurisë e Bosnjës e kishte dërguar kërkesën menjëherë pasi autoritetet lokale deklaruan se madhësia e katastrofës tejkaloi aftësinë e tyre për t’u përballur.
Ambasadori i BE-së në Bosnje-Hercegovinë, Luigi Soreca, postoi në Twitter konfirmimin e aktivizimit të EUCPM dhe nënvizoi rëndësinë e solidaritetit të BE-së.
Komisioneri Evropian për Menaxhimin e Krizave, Janez Lenarçiç, shkroi në Twitter se ”në përgjigje të përmbytjeve vdekjeprurëse në Bosnje dhe Hercegovinë, ne kemi vendosur ekipe shpëtimi nga Kroacia, Sllovenia dhe Serbia nëpërmjet Mekanizmit të Mbrojtjes Civile të BE-së”.
”Kroacia, Sllovakia, Polonia, Sllovenia, Serbia, Shqipëria, Turqia, Maqedonia e Veriut dhe Mali i Zi kanë ofruar gjithashtu mbështetje emergjente, duke përfshirë ekipe, pompa, ekskavatorë, gjeneratorë dhe më shumë. Ky është solidariteti i BE-së!” shtoi ai.