Ermir Dedja u vra dhe ende Policia e Shtetit nuk pa autor për këtë krim. Hetimet për zbardhjen e vrasjes në Durrës po vijojnë intensivisht, por ende nuk është identifikuar asnjë i dyshuar konkret për ekzekutimin.
Grupi hetimor është fokusuar në mbledhjen e çdo të dhëne që mund të çojë në gjurmët e autorëve, ndërsa pista kryesore e hetimeve mbetet ajo e larjes së hesapeve për shkak të prishjes së pazareve të drogës, pa anashkaluar dhe pista të tjera.
Mësohet se gjatë 24 orëve të fundit janë marrë në pyetje nëna e viktimës, të afërm të tij, si dhe miq, të gjithë në cilësinë e personave që mund të ndihmojnë në hetim. Dedja u ekzekutua në orët e para të mëngjesit të së martës, në një atentat të mirëorganizuar me karakter mafioz, ndërkohë që autorët mbeten ende të paidentifikuar.
Pak orë pas ngjarjes, në Gërdec të Tiranës, policia gjeti të djegur një automjet të dyshuar se u përdor në krim, brenda të cilit ndodhej edhe një armë zjarri, metodë klasike e përdorur nga autorët për të zhdukur gjurmët, duke vështirësuar identifikimin e tyre. Hetimet po vijojnë në disa pista.