Ditën e sotme peshëngritësi Briken Calja është nderuar me titullin Nderi i Qarkut të Elbasanit. Këto dy vitet e fundit kanë qenë të jashtëzakonshme për peshëngritësin, i cili ka arritur të koleksionojë 4 medalje ari dhe 2 argjendti. Calja e ka ndarë gëzimin edhe me ndjekësit e tij në rrjetet sociale, teksa është shprehur se është një kënaqësi kur arritjet në karrierë vlerësohen dhe plotësojnë njëra-tjetrën.
“NDERI I QARKUT TË ELBASANIT
Një nder i madh dhe një krenari e jashtëzakonshme të shpallem “Nderi i qarkut të Elbasanit”.
Ky çmim ishte qershia mbi tortë pas titullit “Kalorës i Urdhrit të Skënderbeut” dhënë nga Presidenti i Republikës dhe “Qytetar i Nderit i Cërrikut” nga Bashkia e Cërrikut.
Krenar për çdo medalje dhe çmim të fituar, janë një vlerë e theksuar morale dhe forcë e madhe shtytëse për të ardhmen.
Pas dy viteve të jashtëzakonshme në karrierën time, pas dy viteve ku arrita plot 4 medalje ari dhe 2 argjendi këto çmime janë një vlerësim i lartë dhe një nderi i madh për mua, një kënaqësi e veçantë teksa shoh që arritjet në karrierë vlerësohen dhe plotësojnë njëra-tjetrën. Falenderoj çdokënd për mbështetjen dhe vlerësimin në çdo hap timin. Një e ardhme optimiste na pret përpara”, ishin fjalët e Caljes.