Deputetja e Qarkut të Dibrës, Dhurata Çupi, është mjaft agresive ndaj Partisë Socialiste. Madje nuk e ka problem të shprehet se “jam e besuara e Bashës dhe ma do puna të reagoj në këtë mënyrë”. Në daljet publike dhe takimet me strukturat e PD-së Mat (pasi në Dibër e kanë refuzuar) “lufton” me mullinjtë e erës. Në asnjë rast nuk flet për skandalet në Bashkitë Mat e Klos, por flet vetëm me zhargonin e Bashës. Çupi shfrytëzon maksimalisht “kazanin” mediatik për t’i treguar Bashës besnikërinë e saj dhe për ta bindur se duhet ta kandidojë në Tiranë, pasi në rajonin e Dibrës shanset për një mandat të dytë janë pothuajse zero. Madje dhe njerëzit e PD-së nuk kanë besim se do të tregohet korrekte me kandidatët për kryetar bashkie.
Bashkëshorti i deputetes Dhurata Çupi, Agron Tyli ka punuar me katër qeveri, “Berisha-Xhuveli”, “Berisha-Meta”, “Rama-Meta” dhe së fundi me qeverinë “Rama”, siç është etiketuar “Tepsia”. Anëtarë e simpatizantë të PD-së në Mat deklarojnë se deri para pak ditësh Tyli ishte Drejtor i Drejtorisë së Shërbimeve të Brendëshme, në Drejtorinë e Përgjithshme të Rrugëve.
Ndërsa bashkëshortja e tij, deputete e PD, vazhdon e denoncon “egërsisht”, korrupsionin me tenderët dhe koncesionet e rrugëve, duke quajtur drejtuesit e kësaj drejtorie, “hajdutë kukulla” në shërbim të kryemafiozit Edi Rama dhe kërkon, dënimin e tyre për falsifikime dosjesh e vjedhje të fondeve publike.
Ish-drejtori Afrim Qëndro, i ka ndryshuar pozicionin e punës burrit të deputetes dhe ai, në vend të largohet nga ajo “çerdhe krimi e hajdutësh”, siç e quan gruaja e tij, i ka kërkuar gjykatës, rikthimin në postin që kishte, me çështjen Nr. 31154-04615-86-2018, datë 23.11.2018, Gjykata Administrative e Apelit-Tiranë.