””Epidemia” e shtëpive të barit”, është titulli i një shkrimi nga gazeta britanike ”The Telegraph”, ku zbulon se në veç në 3 muaj mbi 100 djem shqiptar të kapur brenda fermave të kanabisit janë burgosur në ishull.
Llogaritë tregojnë se policia ka sekuestruar kanabis me vlerë 130 milionë paund në aksionet ku këta emigrantë të paligjshëm janë arrestuar. Ndërkohë sa i përket dënimit, të gjithë këta individë janë ndëshkuar me 300 vite burg në total. Tre të katërtat (77) nga 101 shqiptarët e dërguar pas hekurave midis gushtit dhe tetorit të këtij viti janë dënuar për prodhim kanabisi në Angli ose në Uells.
Ata janë ndaluar thuajse të gjithë gjatë operacionit të koduar “Mille” që çoi në shkatërrimin e dhjetëra “shtëpive të barit” dhe 180,000 bimëve kanabis, por edhe në goditjen e bandave të përfshira në vepra të tjera penale, si pastrimi i parave, kontrabanda e kokainës dhe drogave të rënda.
Në pesë vitet e fundit, bandat shqiptare kanë shtënë në dorë tregun e kanabisit me “kopshtarët” e rekrutuar nga vendlindja që kanë sjellë në ishull kulturën e tyre hidroponike, duke uzurpuar vietnamezët. Numri i shqiptarëve që kaluan në vitin 2022 me gomone kanalin e “La Manshit” ishte 12,301 persona, që përbën më shumë se ¼ e emigrantëve që mbërritën në Britani.
Bandat shqiptare kanë marrë në dorë tregtinë e kanabisit për shkak të rrezikut më të ulët dhe dënimeve minimale, por edhe prej konsumit në rritje, pasi britanikët shpenzuan 2.4 miliardë paund për të blerë 240 ton kanabis në total, në vitin 2021.