Turqia ka filluar sulmet kundër kurdëve në veri-lindje të Sirisë.
Njoftimi është bërë nga Presidenti turk Rexhep Tajip Erdogan, i cili nuk ndryshoi mendim për këtë sulm as pas telefonatës me presidentin rus Vladimir Putin.
Situata ka përshkallëzuar orët e fundit, ku rreth 5,000 trupa turke të grumbulluar në kufi, larguan blloqet e çimentos për të lejuar kalimin e tankeve, kamionëve dhe automjeteve të blinduara. Menjëherë pas urdhërit të Erdogan, u njoftuan sulme ajrore në qytetin Ras al-Ain kundër pozicioneve të milicisë kurde të mbrojtjes popullore (YPG) ndërsa artileria bombardoi Tal Abyad.
Disa orë më vonë, Ministria Turke e Mbrojtjes njoftoi fillimin e një sulmi tokësor. Ushtria turke hyri në Siri së bashku me milicitë lokale të Ushtrisë së Lirë Siriane, transmeton Tirananews.al
Ndërkohë, zëdhënësi i luftëtarëve kurdë në Twitter kishte dhënë alarmin:
“Ata kanë filluar sulme në zona civile. Ka panik të madh midis popullatës në rajon”. Sipas YPG tashmë ka viktima civile, OJQ-ja Siriane Observatori për të Drejtat e Njeriut flet për të paktën 15 të vdekur, përfshirë 8 civilë, të vrarë në Qamishli. Kurdët, nga ana e tyre, u përgjigjën me predha në qytetin e Nusabyn dhe zonën e Ceylanpinar.
Forcat Demokratike Siriane të udhëhequra nga kurdët pretendojnë se kanë refuzuar sulmin tokësor turk në kufirin verior të Sirisë menjëherë pasi Ankaraja njoftoi fillimin e fazës tokësore të operacionit të saj kundër forcave kurde.
“Sulmi tokësor nga forcat turke u zbraps nga luftëtarët e Forcave Demokratike Siriane (FDS)” në rajonin Tal Abyad, tha zëdhënësi i FDS, Mustefa Bali, në Twitter.
Ground attack by Turkish forces has been repelled by SDF fighters in Til Abyad. No advance as of now.
— Mustafa Bali (@mustefabali) October 9, 2019
Nga ana e saj, Ankaraja pretendon se 181 pozicione terroriste janë goditur. Kjo u njoftua nga Ministria e Mbrojtjes e Turqisë, e cituar nga agjencia Anadolu, duke iu referuar forcave kurde që Turqia i konsideron “terroristë”.
l.g/Tirananews.al