Kryeministri i Estonisë, Kristen Michal kritikoi bisedën telefonike një orëshe të kancelarit gjerman Olaf Scholz me presidentin rus Vladimir Putin javën e kaluar – duke e konsideruar atë “një gabim dhe joefektive”.
“Asnjë paqe nuk do të arrihet me këtë bisedë”, tha Michal në një intervistë.
“Përkundrazi, një mesazh pozitiv do të arrihej duke i dhënë Ukrainës më shumë ndihmë, mbështetje, armë”, tha ai.
Estonia është në BE dhe NATO, dhe ndan një kufi me Rusinë. Vendi, i cili dikur ishte pjesë e Bashkimit Sovjetik, ka qenë ndër mbështetësit më të hapur të Ukrainës në luftën e saj kundër pushtimit të vazhdueshëm rus.
Michal tha se muajt e ardhshëm do të jenë shumë të vështirë për Ukrainën – për shkak të sulmeve ruse ndaj infrastrukturës me rëndësi kritike për energjinë dhe ngrohjen.
Michal u bëri thirrje partnerëve të NATO-s të rrisin shpenzimet e mbrojtjes deri në një minimum prej 2,5% të prodhimit të brendshëm bruto (PBB).
Objektivi aktual i NATO-s për shpenzimet ushtarake është të paktën 2%, ndërsa Estonia po shpenzon 3,4% për të këtë vit.