Në Ditën Botërore të Farmacistit, i cili ka një rol jo pak të rëndësishëm si hallka ndërmjet mjekut dhe pacientit, kërkohet rishikimi i ligjit në mënyrë që farmacisti të mos shihet thjesht si shitës barnash, por të zgjerohet gama e shërbimeve që mund të ofrojë.
Përveç matjes së tensionit apo glicemisë, ai mund të kryejë edhe teste apo të japë këshilla ushqimore, pasi curricula e tyre mësimore ua lejon këtë.
Prof. Dr. Ledjan Malaj nga Departamenti i Farmacisë, në Fakultetin e Mjekësisë thotë: “Një farmacist mund të bëjë terapi të personalizuar. Farmacisti njeh barin dhe mund të zgjedhë vetë cili është bari më cilësor për pacientin. Mjeku duhet të merret me patologjinë dhe mjekimin. Një farmacist mund të kryejë teste ose të mbledhë të dhëna për sëmundshmërinë në vend, pasi është më afër pacientit dhe aksesohet më lehtë.”
Urdhri i Farmacistëve kërkon që të ndërhyhet menjëherë për të rivendosur kriterin e distancave ndërmjet farmacive.
Dëfrim Goma, President i Urdhrit të Farmacistëve shprehet: “Duhet të marrë fund që barnat të tregtohen nga jo-farmacistë. Të vendoset kriter distance, pasi në çdo pallat ke nga tre farmaci. Farmacisti duhet të marrë një fee për shërbimet ekstra që ofron.”
Urdhri i Farmacistëve këtë ditë ia ka dedikuar të moshuarve, duke dhuruar pajisje si matës tensioni, matës glicemie, oksimetër dhe disa barna OTC në Shtëpinë e të Moshuarve në Tiranë, si edhe për qytetarët që janë afruar në dy stenda të vendosura në shesh.