Përzgjedhja e kandidatëve për bashkitë në Qarkun e Vlorës po kthehet në dhimbje koke për Edi Ramën. Tre nga pesë bashkitë nuk po arrijnë dot të gjejnë konsensus për emrin e kandidatit. Në Sarandë kanë nisur diskutimet mes kryetarit aktual dhe kandidatit që po propozon Blendi Klosi.
Selenicë ka një diskutim mes Klosit dhe deputetit Vullnet Sinaj pasi të dy kanë nga një emër.
Kurse në Vlorë, Blendi Klosi po tenton të vendosë si kandidat ambasadorin e Shqipërisë në Emiratet e Bashkuara Arabe, Ermal Dredha.
Dredha, prej vitesh i angazhuar në diplomaci dhe i shkëputur nga qyteti i Vlorës nuk gëzon mbështetje mes socialistëve dhe nuk plotëson dy kriteret kryesore të vendosura, që janë kontributet në parti dhe me banim në Vlorë. Për të plotësuar këtë të dytën, Dredha vetëm javët e fundit ka zhvendosur gjendjen civile në Vlorë.
Nga ana tjetër Edi Rama ka piketuar Fate Velajn si kandidat të Partisë Socialiste për bashkinë e qytetit bregdetar, i cili përmbush kriteret, si për kontributin e dhënë në komunitet dhe brenda partisë, ashtu edhe atë të rezidentit.
Prej një viti Rama i kërkoi Velajt të niste turin në qytet ‘Fate Talks- ide të reja për Vlorën’ për të parë problematikat e qytetit dhe për të dhënë ide të reja zhvillimore.
Kjo e ka detyruar Edi Ramën që ditën e shtunë në mëngjes të mbledhë Asamblenë e zgjeruar të PS për Bashkinë e Vlorës ku do të shikohet situata në lidhje me emrat e kandidatëve.
Burime nga selia e rozë bëjnë me dije se zgjedhja e Ramës është Fate Velaj për të qenë kandidat. Lidhur me këtë Rama ka thënë se me Bashkinë e Vlorës do të merret personalisht për t’i dhënë këtij qyteti një pamje europiane, si në infrastrukturë dhe në mentalitet.