Festa e Vitit të Ri është prishur nga një sulm i frikshëm nga një person, i cili mori përpara me makinën e tij disa persona në shesh. Sipas medieve japoneze nëntë vetë u plagosën, njëri prej të cilëve në gjendje të rëndë, kur turma u sulmua ndërsa ishte duke festuar.
Një zëdhënës i policisë tha se shoferi ishte ndaluar dhe transmetuesi kombëtar NHK tha se njeriu ishte arrestuar me dyshim për vrasje në tentativë. Ai u identifikua si Kazuhiro Kusakabe, 21 vjeç, nga Osaka, një qytet i madh rreth 400 km në jugperëndim të Tokios, tha NHK.
NHK tha se i dyshuari fillimisht e përshkroi incidentin si një “akt terrorist”, por më vonë tha se sulmi ishte në hakmarrje për dënimin me vdekje. Incidenti ndodhi pak minuta pasi kishte hyrë viti i ri në zonën turistike popullore, të Harajuku, afër Shrine Meiji, në Tokio qendrore.
“Nuk mund ta besoj, ky është një vend me të cilin jam i njohur, prandaj është shumë tronditëse”, tha Tatsuhiro Yaegashi, një punëtor 27-vjeçar në zonë.
Rruga ishte e mbyllur për automjetet në kohën e incidentit, për të akomoduar numrin e madh të këmbësorëve që dolën në vendin e shenjtë për lutjet e Vitit të Ri.
I dyshuari u largua nga vendi i ngjarjes dhe sulmoi një kalimtar përpara se të kapej 20 minuta më vonë, tha NHK. Në automjet u gjetën rreth 20 litra vajguri.