Kongresi i sotëm i FIFA-s ka shërbyer jo vetëm për të rizgjedhur Xhani Infantinon në postin e tij si kreu i këtij institucioni për katër vitet e ardhshme, por edhe për të pasqyruar e aprovuar bilancet financiare si dhe për të shpalosur projektet e së ardhmes. Mes të dhënave të publikuara sot zyrtarisht nga FIFA janë edhe ato që i përkasin vendit tonë, shifrat që FSHF ka përfituar për investime apo për të mbuluar shpenzimet e saj operacionale.
Në ciklin trevjeçar që me emërimin e Infantinos si kreu i FIFA-s, 2016-2018, të dhënat tregojnë se FSHF ka përfituar pak më shumë se 3,1 milionë dollarë në këtë periudhë kohore. 1 milion e 575 mijë dollarë kanë shkuar për shpenzimet e projekteve të ndryshme që bëhen në bashkëpunim me FIFA-n, si për shembull infrastruktura. 1,5 milionë dollarë i janë paguar institucionit të futbollit që të paguajë shpenzimet e tij operative, si dhe 100 mijë dollarë për kostot e udhëtimeve apo për blerje pajisjesh.
Në total, janë 3,175 milionë dollarë të përfituar nga FSHF, rreth 82% e shumës maksimale prej 3,851 milionë dollarësh që mund të kishte përfituar në këtë cikël. Kjo, pasi fondet e FIFA-s jepen në varësi të objektivave që përmbush çdo federatë në organizimin e strukturave të saj apo aktiviteteve që i kërkon FIFA.