Skuadra e Barcelonës sot ka fituar një ndeshje shumë të rëndësishme ndaj Real Madrid, duke e mposhtur 3-0 në shtëpi këtë të fundit për të siguruar pjesëmarrjen në finalen e Kupës së Mbretit. Në fakt, katalanasit sot hynë në histori, pasi u bënë skuadra e parë spanjolle që shkon në 6 finale radhazi të turneut, si askush më parë, as Reali në periudhën e tij më të artë kur dominonte pa kundërshtarë futbollin spanjoll.
Por për katalanasit, “El Clasico” i sotëm kishte një shije shumë më të veçantë. Në dekadën e fundit, ata kanë arritur të thyejnë trendin e sukseseve të Real Madrid, i cili kishte qenë zakonisht dominues në duele të tilla mes dy rivalëve e si rrjedhojë, me fitoren e sotme “El Clasico” mund të cilësohet në barazi të plotë.
Tashmë si Reali, ashtu edhe Barcelona, regjistrojnë nga 95 fitore secila në sfida zyrtare, kurse 51 takime kanë përfunduar në barazim. Të shtunën e ardhshme, kur luhet edhe “El Clasico” në kampionat, Barcelona do të ketë mundësinë të thyejë një tabu 87-vjeçare nëse arrin të sigurojë fitoren. Kjo pasi hera e fundit kur Barcelona ishte përpara në duelet direkt me Realin, ishte pikërisht 87 vite më parë. Që atëherë, dominimi ka qenë në krahun e “los blancos”.