Komisioni Qendror i Zgjedhjeve i është përgjigjur akuzave të Partisë Demokratike, lidhur me KZAZ-në nr.6 në Vaun e Dejës.
Sipas PD në këtë KZAZ është votuar me fletë të falsifikuara, pas djegies së tyre disa ditë para 30 qershorit nga mbështësit e opozitës.
Ndërkohë, KQZ i ka hedhur poshtë këto akuza. Zëdhënësja Drilona Hoxhaj, deklaroi se më 28 qershor janë riprodhuar nga kompania sllovene fletët, ndërsa mëngjesin e 30 qershorit ato kanë mbërritur sërish në qendrën e votimit të Vaut të Dejës.
“Pas djegies së KZAZ në Vaun e Dejës, KQZ ka kontaktuar me kompaninë sllovene për të prodhuar sërish fletë votimi. Transporti i fletëve të votimit është bërë në datën 29 qershor, dhe kanë kaluar në Han të Hotit në 2 të mëngjesit të 30 qershorit. Mjeti që transportonte fletët e votimit i është dorëzuar punonjësve të KQZ. Kjo procedurë ka përfunduar në orën 02:15 të mëngjesit në datë 30 qershor dhe fletët e votimit janë dorëzuar në KZAZ nr.6. Shpërndarja ka përfunduar në orën 06:00 të mëngjesit”, tha Hoxhaj.