Kryetari i Grupit Parlamentar të PS-së Taulant Balla ka deklaruar në Kuvend, se ndërprerja e bashkëpunimit nga fondacioni gjerman nuk ka ardhur për shkak të qeverisë shqiptare. Sipas tij kjo vendimmarrje e “Hanns -Seidel” lidhet edhe me shkurtimin e fondeve që qeveria federale gjermane i jep fondacionit.
Ai u shpreh më tej se marrëdhëniet e Shqipërisë me Gjermaninë janë në nivelin më të mirë që ndonjëherë kanë qenë. Balla tha se Gjermania mbetet partneri kryesor i Shqipërisë brenda vendeve të BE-së, por është vendi i pari sa i përket financimeve të drejtpërdrejta.
“Në emër të grupit të PS falenderoj fondacionin gjerman “Hanns-Seidel”. Që prej ditëve të para të pluralizmit politik në Shqipëri, ky fondacion ka asistuar dhe ka ndihmuar në forcimin e institucioneve demokratike në vend dhe aktivitetit të partive politike, institucioneve të drejtësisë, policisë së shtetit apo pushtetit qendror. Vendimmarrja e fondacionit që lidhet edhe me një shkurtim të fondeve që qeveria federale gjermane i jep. Nuk ka të bëjë me atë se fondacioni po ikën se e ka përzënë Shqipëria. Secili prej nesh mban përgjegjësi për ato që nxjerr nga goja. Unë mirëkuptoj këdo koleg në opozitë që gjen gjithcka për të kritikuar qeverinë. Por të thuash së fondacioni ikën se nuk i pëlqën qeveria, po fondacioni “Konrad Adenauer” që bashkëpunon me ju. O është mërzitur me ju sepse po harxhon me ju dhe prapë s’po bëheni. Mendon që pas 2030 do të vijë një moment që këto fondacione nuk të kenë më zyrë në Tiranë. Zotëria që bëri një përrua psiqik këtu, që kam respekt edhe për shka të moshës besoj kërkuat një ndjesë. Për të mos harruar nivelin e marrëdhënieve më të mirë historik që Shqipëria ka me Gjermaninë. Kancelarët gjermanë e kanë vizituar zyrtarisht Shqipërinë pas vitit 2013, duke nisur me vizitën historike të Merkel dhe për të vijuar me atë të Scholz. Gjermani mbetet partneri ynë kryesor brenda vendeve të BE-së, por është i pari sa i përket financimeve të drejtpërdrejta”, tha Balla.