Nëse Shqipëria i bëri eksperimentet e saj të kualifikuesve me Andorrën, Franca do t’i bëjë pikërisht me kuqezinjtë. Mediat franceze kanë mbetur të befasuara kur nga kampi i “gjelave” kanë dalë lajmet se trajneri Didier Deshamp po mendon të hedhë në fushë një rreshtim eksperimental.
Në fakt, duket se tekniku po kopjon idenë e lojës të Edi Rejas, pasi edhe ai do të ndryshojë stilin e zakonshëm të francezëve për të kthyer mbrojtjen me 3, ashtu siç aplikojnë kuqezinjtë me italianin.
Varan, Kimpembe dhe Lengle parashikohet të rreshtohen para Mandanda në këtë formacion. Nga krahët, Mendi dhe Dybua do të mbështetin mesfushën, ku do të veprojnë në qendër Toliso e Sisoko. Ndërkohë, rreshtimi nuk dihet ende nëse do të jetë një 3-5-2 i mirëfilltë apo një 3-4-3. Por duket e sigurt se në sulm do të jetë Ben Jeder me njërin mes Grizman e Mbape që do të veprojë si një 10 e mirëfilltë, ose me të dy që do veprojnë nga krahët e tij.
Një rreshtim eksperimental i ndikuar nga disa mungesa, por që gjithsesi ka lënë të çuditur francezët, pasi askush nuk priste që Deshamp të përdorte një ndeshje zyrtare për të provuar një skemë të re, aq më shumë kur në lojë është vendi i parë në grup.