Formula 1 po zhvillon një botëror intensiv dhe kompleks, mes garave që vijojnë, azhurnimeve të makinave në një kampionat që i paraprin vitit të ndryshimeve të mëdha, 2026-ës.
Ndryshimi i rregulloreve është edhe sfida më e madhe që i pret skuadrat dhe që do të përcaktojë të ardhmen e këtij sporti.
Ka opinione dhe reflektime të llojeve të ndryshme rreth asaj se si do të jetë Formula 1 në të ardhmen.
Aston Martin, për shembull, nuk e fsheh faktin se do të jetë një sfidë e madhe dhe nuk ngurron ta shpjegojë atë. Por ka të tjerë që e shohin të ardhmen me më skepticizëm dhe një prej tyre është as më e pak as më shumë, por vetë shtatë herë kampioni i botës, Luis Hamilton.
Britaniku është i qartë në mendimin e tij për ndryshimet në botën e Formulës 1 dhe nuk sheh asgjë pozitive në zhvillimet e reja.
“Personalisht nuk mendoj se Formula 1 po shkon në drejtimin e duhur”, shpjegon Hamilton për “Sky Italia”.
Britaniku ishte një nga ata që e mirëpritën ardhjen e motorit V10, por nuk është plotësisht i kënaqur me ndryshimin për të zvogëluar makinat, me aerodinamikë të ndryshme dhe që kërkojnë lloj tjetër garash.
“Po shkojmë në një drejtim më të ngadaltë, makinat janë më të rënda. Vitin tjetër do të jenë më të lehta, por këto janë më të rëndat që kam drejtuar”, argumentoi piloti i Ferrarit.
Luis përqendrohet më shumë në një aspekt estetik sesa në çdo gjë tjetër.
“Më mungon tingulli i motorit. Kur dëgjon një Ferrari V12, dëgjon pasionin. Kur filluam me V6, ishte pozitive për sa i përket qëndrueshmërisë, por nuk mund ta harrojmë faktin se zhurma është e ndryshme kur shikonim Mikael Shumaker me Ferrarin në vitin 2003”, analizon Hamilton.
Në pritje të kontaktit të vërtetë në pistë, për momentin, ekipet po testojnë vetëm në simulator dhe po zhvillojnë teori rreth rëndësisë së motorëve.
FIA, siç dihej tashmë, ka vendosur në rregullore që makinat të jenë më të lehta dhe më të shkurtra me aerodinamikë aktive, më pak efekt në tokë dhe aftësi më të madhe parakalimi përmes përdorimit të energjisë.