Foshnja e seksit mashkull që u gjet ditën e djeshme i braktisur në bodrumin e një pallati në zonën e Yzberishtit në Tiranë, pak pasi kishte ardhur në jetë, nuk mundi të mbijetonte. Ministri i Brendshëm, Taulant Balla bën të ditur se pavarësisht përpjekjeve të mjekëve të spitalit Obstetrik-Gjinekologjik “Koço Gliozheni”, vogëlushi nuk ia doli.
”Sapo mora një lajm të trishtë nga Drejtori i Spitalit Obstetrik-Gjinekologjik “Koço Gliozheni” , i cili më njoftoi se foshnja e braktisur në zonën e Yzberishtit në Tiranë nuk ia doli dot edhe pse mjekët e spitalit bënë të gjitha përpjekjet.
Policia e Shtetit ka identifikuar dhe ka ndaluar nënën që e braktisi pa na dhënë mundësinë ne të gjithëve, agjencive shtetërore, shoqërisë civile ta gjenim në kohë dhe të mund ta shpëtonim. Kjo është një ngjarje e rëndë që kërkon një reflektim dhe masa konkrete nga të gjithë”,-shkruan Balla.
Egljanta Isufi, është nëna e foshnjës së braktisur që preku zemrat e të gjithë opinionit publik. Ajo rezulton që është e pamartuar dhe nuk ka fëmijë të tjerë. Ajo ka deklaruar se arsyeja që e ka fshehur shtatzëninë e saj dhe ka braktisur foshnjen ka qenë për shkak se nuk ka dashur që të merret vesh nga familjarët e saj, por edhe opinioni, pasi nuk është e martuar.
Grupi hetimor ka pasur dyshime se 30-vjeçarja e ka lindur foshnjën e vetme në garazhin e pallatit ku dhe më pas e ka braktisur dhe është kthyer në banesë. Vajza nuk ka folur fare për babain e fëmijës, por ka kërkuar të mos identifikohet dhe më pas është transportuar për në spital.
Bebja shkoi dje pa shenja jete në spital, por erdhi në jetë pasi u fut në reanimacion intensiv dhe masazhit kardiak ndërsa sot zemra e tij ndali. Sipas informacioneve nga bluzat e bardha, shkak i kësaj gjendje të foshnjes është bërë lindja e tij në kushte të pa përshtatshme.