Kryeministri Edi Rama pas përfundimit të seancës plenare sot në Kuvend ka udhëtuar menjëherë drejt Italisë. Shefi i qeverisë ka dhënë një intervistë për televizionin italian ‘Rai Uno’ për emisionin ‘Porta a Porta’ me gazetarin Bruno Vespa.
Kjo intervistë do të transmetohet në orën 23:05 minuta në televizionin italian dhe në “ERTV”, ndërsa mësohet se Rama do të jetë përballë një paneli të ftuarish dhe do të flasë për zhvillimet e fundit politike në Shqipëri.
Kryeministri ka publikuar një foto në studion e emisionit, ku shfaqet me kostum dhe atlete të bardha, stil ky, që është komentuar dhe ka ngjallur reagime në opinionin publik.
Shefi i qeverisë udhëtoi drejt vendit fqinj menjëherë pasi përfundoi fjalën në Kuvend teksa deklaroi se dora e dialogu ndaj opozitës është e shtrirë, por shtoi se ajo që nuk pranon të negociojë ka të bëjë me mandatin e qeverisë.