Frika nga mësymja turke ka detyruar milicinë kurde që t’i kërkojë ushtrisë siriane që të rifutet në qytetin verior të Manbijit. Turqia i konsideron forcat kurde si pjesë të një grupi terrorist dhe zhvendosi një numër të madh të njësiteve ushtarake në kufirin sirian me qëllim për t’u futur e për të shkatërruar siaps saj terroristët. Kërkesa e kurdëve, u mbështet nga SHBA. Ajo pasoi lajmërimin e papritur se Amerika do të tërheqë të gjitha trupat nga Siria.
Presidenti Donald Trump foli për tërheqjen e rreth 2.000 trupave javën e shkuar, duke deklaruar se grupi i Shtetit Islamik ishte mundur. Por, pretendimi është vënë në diskutim nga aleatë të rëndësishëm, që thonë se lëvizja mund të çojë në një ringritje të grupit.
Manbij është një qytet me rëndësi strategjike në Sirinë veriore, që deri më tani ishte nën kontrollin e forcave kurde të mbështetura nga SHBA. Kurdët, që udhëhoqën luftën kundër Shtetit Islamik, e shohin vendimin e Trumpit si një tradhti. Pa SHBA-në, udhëheqësit kurdë tani shpresojnë që prania e ushtrisë qeveritare siriane, që mbështetet nga Rusia dhe Irani, do të pengojë Turqinë të nisë ndonjë sulm.