Një situatë e pazakontë me kandidatin republikan për guvernator në Mississipi, Robert Foster, e zuri të papërgatitur gazetaren Larrison Campbell.
Pasi i kërkoi të realizonte një reportazh me të duke e ndjekur në një ditë të fushatës, përgjigja që mori ishte e papritur: Intervista nuk ndodhte nëse ajo nuk merrte edhe një burrë me vete, sepse politikani nuk donte të kalonte kohë vetëm me një grua tjetër veç gruas së vet.
“Nuk doja të përfundoja në një situatë ku unë dhe zonja Campbell të ishim vetëm për një kohë të gjatë, përgjatë ditës 15- 16 orëshe”, u shpreh Foster për “CNN”.
I pyetur nëse mori këtë vendim pasi ka frikë se tundohet, ai u shpreh: “Unë kam besim të plotë tek vetja. Por nuk kam besim të perceptimi që krijon bota për një njeri kur shikon diçka dhe kur nuk bëhen pyetjet. Askush nuk kërkon të vërtetën.”
Në studion e “CNN” ishte reporterja, e cila iu përgjigj kështu kandidatit republikan, i cili po fliste në telefon: “Përse duhet të jetë e gabuar vetëm kur bëhet fjalë për një gazetare grua? Përse nuk perceptohet e zëmë, një lidhje homoseksuale, nëse je me një gazetar burrë? Apo e ke fjalën që një grua është pikë së pari një objekt seksual, pastaj një reportere?”
Argumenti i Robert Foster ishte se ai është një burrë i martuar përpara Zotit, në kishë, dhe sipas betimeve të martesës, nuk mund të qëndrojë në një dhomë me dikë të seksit të kundërt.
“Më vjen keq nëse kjo të lëndoi, por unë zgjedh të mbaj betimet që i kam bërë time shoqeje përpara çdo njeriu tjetër. Nuk do ta vendos kurrë veten në një situatë me çfarëdo femre për të cilën mund të më akuzojnë dhe ku të mos ketë një dëshmitar që të tregojë të kundërtën.”