Komisioni i Ankesave dhe Sanksioneve, i mbledhur mbrëmjen e kësaj të diele, ka rrëzuar kërkesën e Gjergj Nikës për tu regjistruar si kandidat i pavarur për bashkinë e Vlorës.
Anëtarët e KAS, argumentuan, se edhe pse gëzonte mandatin e këshilltarit bashkiak të Vlorës, Nika duhet të kishte regjistruar një Komitet Nismëtar, në përputhje me kërkesat e ligjit për kandidatët e propozuar nga zgjedhësit.
Sipas arsyetimit të KQZ, ligji shqiptar nuk e njeh vetëshpalljen kandidat, ndaj duhet Komiteti Nismëtar, edhe pse Nikës, për shkak të mandatit si këshilltar, nuk do t’i duhej të mblidhte firmat e 1% të zgjedhësve të Vlorës.
KAS ju referua në vendimmarrjen e tij, një vendimi të Kolegjit Zgjedhor të vitit 2023, i cili kishte refuzuar të regjistronte si të pavarur një kandidat për këshilltar në bashkinë e Sarandës, pikërisht se ai, një lloj si Nika, nuk kishte regjistruar në KQZ një Komitet Nismëtar, duke besuar se gëzimi i një mandati si i zgjedhur lokal, mjaftonte.
Nika nuk u regjistrua në shkallën e parë administrative nga Komisioneri Celibashi, vendim që u konfirmua edhe nga KAS. Gjithsesi, Kolegji Zgjedhor është mundësia e tij e fundit.
“Provojeni fatin në Kolegj”-tha relatori Ilir Rusmali.
“Kolegji evoluon se është trupë e re nga ajo e 2023, por jo ne”,-përmbylli ai mbledhjen.