Inteligjenca ushtarake gjermane ka rritur vigjilencën ndaj aktiviteteve spiunazhi të Iranit, pas deklaratës së Teheranit që i cilësoi Forcat e Armatosura të Gjermanisë dhe forcat e tjera të BE-së si “grupe terroriste” në kundërpërgjigje të vendosjes së Gardës Revolucionare Islamike në listën e organizatave terroriste nga Bashkimi Evropian. Lëvizja ka krijuar një mjedis të ri kërcënimi për objektet dhe personelin ushtarak gjerman, duke përfshirë rreziqe të spiunazhit kibernetik dhe tradicional.
Shërbimi i Kundërzbulimit Ushtarak të Gjermanisë (MAD) theksoi se agjencitë iraniane të inteligjencës janë “një nga aktorët kryesorë që kryejnë aktivitete spiunazhi kundër Bundeswehr-it”. Njësitë më të ekspozuara marrin mbështetje të veçantë, përfshirë informime dhe trajnime për të identifikuar dhe parandaluar operacionet e inteligjencës së huaj. Zëdhënësi i MAD paralajmëroi gjithashtu për rreziqet e spiunazhit kibernetik, duke përfshirë hakerimin e llogarive të email-it dhe të mediave sociale për të gjurmuar lëvizjet dhe kontaktet e individëve.
Operacionet iraniane nuk drejtohen vetëm kundër objektivave ushtarake, por edhe ndaj disidentëve politikë iranianë në Gjermani dhe komuniteteve hebraike dhe izraelite. Një rast i profilit të lartë është ai i Jamshid Sharmahd, aktivist gjermano-iranian i rrëmbyer në vitin 2020 dhe i dërguar në Iran, ku u dënua me vdekje. Sipas autoriteteve gjermane, aktivitetet e Iranit intensifikuan pas sulmit të udhëhequr nga Hamasi në Izraelin jugor më 7 tetor 2023.
Konstantin von Notz, kryetar i Komitetit Mbikëqyrës Parlamentar, i bëri thirrje qeverisë gjermane të marrë “të gjitha masat e nevojshme për të frenuar aktivitetet e inteligjencës së Iranit dhe për të garantuar sigurinë e ushtarëve, institucioneve dhe komuniteteve të prekura në vend”.