Sekretari i Përgjithshëm i Partisë Socialiste është shprehur se nuk është i mërzitur që nuk është bërë Ministër. Në një intervistë në emisionin “Çim Peka Live”, Gjiknuri tha se i është besuar një detyrë e re dhe se e ka marrë me kënaqësi atë. Kur u pyet në lidhje me Taulant Ballën, të cilit i zuri vendin, u shpreh se as numri një i grupit parlamentar nuk ka arsye që të mërzitet.
PJESË NGA BISEDA:
Gjiknuri: Hera e parë që më bëhet kjo pyetje direkt, unë nuk kam patur ndonjë dëshirë që të isha në qeveri. Pse? Sepse kam qenë ministër për 5 vite e gjysmë, kam bërë udhëtimin tim politik në ministri të rëndësishme dhe kam drejtuar reforma të rëndësishme. Këto janë dy vendime që i merr i zoti i punës ose vota. Nuk kisha ndonjë dëshirë. Më pëlqente një sfidë tjetër. Unë kam patur babain deputet, 1997-2001. Sali Berisha e njeh se kanë qenë një brez. Nga brezi i pedagogëve të fakultetit të shkencave. Gjithë këto vite kontribut në PS, njeriu do të kontribuojë edhe në pozicione politike, pavarësisht nga ngarkesa që ka ky pozicion, pra të merresh me partinë. Partia do kontakte me njerëz, janë organizata vullentare. E ndaj nga kjo pikëpamje, nuk jam i pezmatuar. Më është besuar një detyrë e re që e kam marrë me kënaqësi.
Peka: Po zoti Balla ju duket i pezmatuar?
Gjiknuri: Nuk ka arsye. Duhet të pyesni zotin Balla, por personalisht mendoj se nuk ka arsye. Ka karrierë në politikë. Ka më shumë vite se unë në plitikë. S’ka pse të mërzitet për pozicionime të caktuara në momente të caktuara.
Peka: Pse Balla nuk arriti të bëhej ministër?
Gjiknuri: Duhet të pyesni kryeministrin. I zoti është ai që edhe kur nuk është ministër mbijeton në politikë. Nuk të bën posti, mund të të japin një post, por nuk di ta përdorësh dhe nuk bëhesh dot lider.