Zëdhënësja e “Foltores”, Floriana Garo, e cila pak ditë më parë u zgjodh edhe anëtare e Kryesisë së Partisë Demokratike të rithemeluar, ka folur për angazhimin dhe rrugëtimin e saj në botën politike. E ftuar këtë të enjte në emisionin “Rudina”, ajo ka treguar cilat ishin arsyet që e çuan drejt kësaj zgjedhjeje, dhe pse pikërisht në kampin blu, përkrah ish-kryeministrit Sali Berisha.
Garo ka ndarë edhe disa këshilla që ka marrë prej liderit historik të së djathtës.
“Ai më ka dhënë disa këshilla që unë mundohem t’i kem parasysh gjithmonë. Mbi të gjitha, ka thënë që nëse do të jesh në politikë, ti duhet të bëhesh avokatja e njerëzve, pra t’i mbrosh ata, t’i mbrosh të gjitha dëshirat dhe synimet e tyre dhe kur ata janë të pambrojtur, ti duhet të jesh aty për të folur dhe për të luftuar për ta. Dhe krahas saj, të qëndroj grua e qetë në debate televizive, ishte kënaqësi kur e dëgjova nga zoti Berisha këtë gjë”, u shpreh Garo.