Në ditën kur Gjykata Tiranës ka rrëzuar Asamblenë Zgjedhore të 2 marsit, duke kërkuar që të pritet derisa të mbarojnë hetimet për manipulimet në Shoqatat Rajonale, FSHF është kujtuar që të prezantojë një strategji për futbollin në vendin tonë.
‘Në emër të Federatës Shqiptare të Futbollit dua t’ju falënderoj shumë që jeni sot të pranishëm në këtë ditë të rëndësishme për ne dhe komunitetin e futbollit shqiptar, ku konkretizojmë strategjinë “Futbolli për Kombi 2022-2025”. Keni në dorë një material të detajuar dhe të mirëmenduar, i cili është një plan i mirëfilltë pune me hapat dhe aksionet për të arritur objektivat e rëndësishëm që kemi vendosur.
Fokusi kryesor i punës sonë do të jenë fëmijët dhe të rinjtë, por në të njëjtën kohë do të ndajmë përvojën pozitive të futbollit me të gjithë qytetarët dhe do t’u ofrojmë atyre mundësinë për t’u angazhuar në futboll.
Procesi i përgatitjes së këtij dokumenti strategjik ka zgjatur disa muaj, janë organizuar takime me grupet e interesit dhe është përgatitur në bashkëpunim të ngushtë me ekspertët e UEFA Grow, të cilët dëshiroj t’i falënderoj për mbështetjen e tyre shumë të vlefshme.
Me lanҫimin e strategjisë “Futbolli për Kombin 2022-2025”, ne kemi vendosur piketa të forta për të ardhmen, duke qenë të ndërgjegjshëm për fuqinë tonë si organizatë dhe për të gjitha mundësitë që kemi për të mbështetur më tej zhvillimin e futbollit në të gjithë Shqipërinë.
Kjo strategji dhe zbatimi i saj do të jetë një forcë shtytëse pozitive në hapësirën sportive dhe sociale në mbarë Shqipërinë dhe gjithashtu do të forcojë lojën e bukur të futbollit e do të promovojë vlerat e tij në të gjithë trevat shqiptare, për të përmirësuar jo vetëm paraqitjet në fushë, por edhe cilësinë e jetës për të gjithë qytetarët shqiptar. Kjo është shumë e rëndësishme për ne’ ka thënë Duka.