Një konflikt i fortë fizik dhe me armë të ftohta ka ndodhur dy ditë më parë në Spitalin Rajonal të Elbasanit, ku Anton Kasa tentoi të vriste me mjet të mprehtë, 36-vjeçarin Denis Bardhin.
Si pasojë, Gjykata e Elbasanit ka vendosur këtë diel arrest në burg për Anton Kasën dhe Detyrim paraqitjeje për mjekun Klidi Dodi, pasi nuk e njoftoi policinë kur Bardhi u paraqit në spital.
Njoftimet e Shkallës së Parë të Juridiksionit të Përgjithshëm Elbasan:
Për mjekun Klidi Dodin:
- Pranimin e kërkesës.
- Vleftësimin e ligjshëm të ndalimit të personit nën hetim K.D., i ndaluar nga policia gjyqësore, si i dyshuar për kryerjen e veprës penale të “Shpërdorimit të detyrës” të parashikuar nga neni 248 i Kodit Penal.
- Caktimin e masave të sigurimit personal “Detyrimit për t`u paraqitur në policinë gjyqësore”, “Ndalimit të daljes jashtë shtetit ”dhe “Pezullimit të ushtrimit të detyrës a shërbimit publik” të parashikuar nga nenet 233, 234 dhe 242 të Kodit të Procedurës Penale për personin nën hetim Klidit Dodi
- Urdhërohet personi nën hetim K.D., që të paraqitet në policinë gjyqësore javën e parë dhe të tretë të çdo muaji, ditë e hënë, ora 12:00.
- Urdhërohet personi nën hetim K.D., që të mos largohet nga territori i Republikës së Shqipërisë.
- Urdhërohet personi nën hetim K.D., që të depozitojë pranë prokurorisë mjetet e identifikimit pasaportë dhe kartë identiteti.
- Urdhërohet pezullimi nga detyra e mjekut e personit nën hetim K.D.
- Urdhërohet lirimi i menjëhershëm nga paraburgimi i personit nën hetim K.D., nëse nuk mbahet për ndonjë masë sigurimi tjetër ose dënim penal tjetër.
- Ngarkohet Prokuroria pranë Gjykatës së Shkallës së Parë të Juridiksionit të Përgjithshëm Elbasan për ekzekutimin e këtij vendimi.
- Shpenzimet gjyqësore lihen siç janë bërë.
- Kundër këtij vendimi lejohet ankim në Gjykatën e Apelit të Juridiksionit të Përgjithshëm, brenda 5 (pesë) ditëve, duke filluar ky afat nga dita e nesërme e njoftimit të arsyetuar të tij.
Për 65-vjeçarin Anton Kasën:
Sot më datë 13.10.2024, Gjykata e Shkallës së Parë e Juridiksionit të Përgjithshëm Elbasan me trup gjykues të përbërë nga Gjyqtar z. Ardit Kuka në përfundim të gjykimit vendosi:
- Pranimin e kërkesës.
- Vleftësimin e ligjshëm të arrestimit në flagrancë të personit nën hetim A.K., i arrestuar nga policia gjyqësore, si i dyshuar për kryerjen e veprës penale të “Vrasjes me dashje”, të mbetur në tentativë, të parashikuar nga neni 78-22 të Kodit Penal.
- Caktimin e masës së sigurimit personal me karakter shtrëngues “arrest në burg” të parashikuar nga neni 238 i Kodit të Procedurës Penale për personin nën hetim A.K..
- Ngarkohet Prokuroria pranë Gjykatës së Shkallës së Parë të Juridiksionit të Përgjithshëm Elbasan për ekzekutimin e këtij vendimi.
- Shpenzimet gjyqësore lihen siç janë bërë.
- Kundër këtij vendimi lejohet ankim në Gjykatën e Apelit të Juridiksionit të Përgjithshëm, brenda 5 (pesë) ditëve, duke filluar ky afat nga dita e nesërme e njoftimit të arsyetuar të tij.