Pano Ruçi vijon grevën e urisë prej 17 ditësh përpara Parlamentit grek në Athinë, duke kërkuar zhvarrimin e djalit të tij Denis Ruçi 22 vjeç. Megjithëse prokurorja e Larisës e ka pranuar këtë kërkesë pak ditë më parë, Pano Ruçi ka thënë se do ta vazhdojë grevën sepse kërkon jo vetëm identifikimin e trupit, por edhe përcaktimin e shkaqeve të vdekjes së djalit të tij.
Sot avokatja e Pano Ruçit kërkoi shtyrjen e datës për zhvarrimin e trupit, që ishte përcaktuar të zhvillohej javën e ardhshme, me qëllim caktimin e një këshilltari teknik. Kërkesa është pranuar nga prokuroria e Larisës.
Ndërkohë, përpara Parlamentit, aty ku prej 17 ditësh Pano Ruçi zhvillon grevë urie, po qëndron edhe një ambulancë e ndihmës së shpejtë, që monitoron herë pas here gjendjen shëndetësore të shqiptarit.
Megjithatë, deri më sot Pano Ruçi nuk ka pranuar t’i nënshtrohet testeve të tilla.
Djali i Pano Ruçit, Denis Ruçit, është një nga 57 viktimat që humbën jetën në aksidentin tragjik hekurudhor në Tempi.