Kreu i Emergjencave Civile, Haki Çako, u pyet teksa ishte i ftuar në “Euronews” për mosshpalljen e gjendjes së fatkeqësisë natyrore në veri të vendit, atje ku situata paraqitet problematike si pasojë e përmbytjeve.
Ndonëse diçka e tillë është kërkuar nga kryebashkiaku i Shkodrës, Bardh Spahia, Çako u shpreh se nuk plotësohet asnjë kriter për shpalljen e kësaj gjendjeje pasi situata ka ardhur duke u përmirësuar.
“Në rastin aktual nuk jemi në asnjë kriter për sa kohë përmbytjet janë të menaxhueshme, të gjitha kapacitetet e shtetit, të pushtetit vendor janë në dispozicion. Ajo që është më pozitivja që situata është drejt përmirësimit, niveli në Drin, Bunë, Gjadër dhe Kir është në rënie. Ligji i ka të qarta kriteret për shpalljen e gjendjes së fatkeqësisë dhe zotërinjtë deputetë i njohim mirë se e kanë votuar vetë ligjin. Edhe një element tjetër. Të gjitha dispozitat e BE kanë të specifikuar mënyrën si funksionin shteti, njësitë e pushtetit vendor”, tha ai.