Kreu i PD-së Lulzim Basha mësohet se ka mbledhur mesditën e të hënës Kolegjin e Kryetarëve. Burime jozyrtare bëjnë të ditur se diskutohen hapat që do të ndjeka PD dhe opozita në ditët në vazhdim.
Ka zgjatur rreth tre orë takimi i kryetarit të PD-së, Lulzim Basha me Kolegjin e Kryetarëve.
Pas këtij takimi Basha tha se protestat do të fuqizohen nga dita në ditë. “Do t’ju informojmë për çdo datë dhe për çdo zhvillim. Vendimi i kryesisë është në fuqi, këto janë takime organizative. Protestat do të vazhdojnë dhe do të fuqizohen nga dita në ditë, nga java në javë, deri sa të realizojmë atë që do çdo shqiptar. Zgjedhje të lira e të ndershme, një qeveri nga populli, për popullin dhe të popullit”, tha Basha pa dhënë detaje të tjera se çfarë është diskutuar apo vendosur në këtë takim.
Pas protestës së të shtunës pritet të zbulohet dhe hapi i radhës i opozitës. Të shtunën Basha lajmëroi se do të ketë protesta në të gjitha qytetet.