Për dy ditë me radhë helikopterë dhe dronë të Ministrisë së Brendëshme kanë patrulluar territorin e rretheve Tropojë, Kukës e Has, për evidentimin e parcelave me bimë narkotike.
Sipas nënprefektit të Tropojës, Granit Kurmekaj pas kontrollit të ushtruar nga mjetet fluturuese të dikasterit të rendit rezultoi se në këtë territor nuk janë kultivuar bimë narkotike, kanabis sativa.
“Është një gjë shumë pozitive që në territorin e Tropojës nuk janë mbjellë bimë narkotike. Kjo tregon shkallën e lartë të ndërgjegjësimit të banorëve të këtushëm se ato nuk duhen kultivuar. Po ashtu ky fakt tregon se strukturat shtetërore të Policisë, Bashkisë dhe institucioneve të tjera në nivel lokal e kanë vlerësuar maksimalisht urdhërin e ministrit Lleshaj”, theksoi Kurmekaj.
Burime të rezervuara saktësojnë se patrullimi nga ajri pritet të vijojë këtë javë në Qarkun e Dibrës, në rrethet Dibër, Bulqizë e Klos. Ministria e Brendëshme ka trajnuar për çdo rreth nga një punonjës policie për përdorimin e dronëve “antikanabis”. tirananews.al