Mbledhja e Këshillit Bashkiak Bulqizë ka dështuar për të tretën herë, për t’u shprehur lidhur me miratimin e projekt-vendimit për heqjen nga fondi pyjor publik në Njësinë Administra Fushë-Bulqizë, pronë e Bashkisë Bulqizë, dhe kalimin në varësi të Ministrisë së Turizmit dhe Mjedisit, duke ndryshuar kategorinë e përdorimit në funksion të ndërtimit të tre HEC-ve.
Këshilltarët i tremben reagimit të fortë të banorëve të Fushë Bulqizës dhe kanë preferuar që në fund të mandatit të tyre të mos përplasen, ndoshta dhe fizikisht, me qytetarët që kërkojnë prej muajsh zgjidhjen e shqetësimit të tyre.
Megjithëse këshilltarët mungonin në këtë mbledhje argumentet e banorëve në mbledhjen e këshillit janë fjalë të thjeshta, fjalë të njerëzve të vuajtur që mbrojnë një pronë të përbashkët, mbrojnë pyjet, mbrojnë ujin.
Nuk është caktuar ende një datë tjetër për lejimin ose jo të ndërtimit të HEC-it në Fushë Bulqizë. /tirananews.al/