Një figurë tepër e njohura e ekranit, moderatorja Fjoralba Ponari ka humbur nënën e saj pak muaj më parë. Nëna e moderatores u nda nga jeta pasi vuante nga një sëmundje e rëndë e këtë periudhë të vështirë Fjoralba e ka kaluar në privatësi me familjarët e saj.
“Është një dhimbje që nuk dua ta flas, dua ta mbaj për vete, por duhet të vazhdojmë të ecim përpara”– tha moderatorja e përlotur pak javë më pas e ftuar në “Goca dhe Gra”. Por, edhe pse ka dalë në ekran dhe i është rikthyer jetës, dhimbja e saj është ende e freskët. Në një intervistë virtuale që ka realizuar me ndjekësit në Instagram dikush e ka pyetur Fjoralbën: “Sa mendon se do i mbash të zezat?”
“Unë jam ende me të errëta, jo të zeza, por mendoj se është shumë personale dhe asnjë ngjyrë në rroba nuk rrit dhe as zvogëlon dhimbjen që ti ndjen. Fundja mund të veshësh gjithë ngjyrat e ylberit dhe shpirtin ta kesh po plagë”.- shkruan Fjoralba.
Humbja e një prindi mund të jetë një prej eksperiencave më të këqija në botë, por dhimbja është shumë personale dhe gjithkush ka mënyrën e tij të vuajtjes e shërimit. Fjoralba në rastin konkret zgjodhi të tregojë figurën e vajzës së fortë në ekran, të cilën s’do ta shohim kurrë të përulur përballë sfidave të jetës.
“Zija” nuk ka shërim dhe prognoza është e ndryshme për çdo person. Përveçse është një vajzë e re që s’ka pse të humbasë asnjë sekond kohë nga jeta e saj, Fjoralba është personazh publik dhe pjesë e ekranit. Njësoj si dikush që punon në një institucion privat apo publik, i cili pasi humb një person të afërt rikthehet sërish në punë. Dhimbja ndjek ligjet e zemrës dhe jo ato të formës.
