Mijëra hungarezë protestuan sot në Budapest kundër ligjit që synon të ndalojë paradën vjetore të krenarisë së grupeve LGBTQ+, raporton “Reuters”.
Parlamenti, i dominuar nga partia Fidesz e kryeministrit hungarez Viktor Orbán, miratoi një ligj muajin e kaluar që ndalon paradën e krenarisë, me arsyetimin se ajo mund të jetë e dëmshme për fëmijët.
Ligji thotë se policia mund të përdorë kamerat e njohjes së fytyrës për të identifikuar njerëzit që marrin pjesë në një ngjarje dhe për të vendosur gjoba për pjesëmarrësit.
Orban i quajti “provokim” protestat e opozitës kundër ligjit të ri.
Një grup prej 22 ambasadash në Budapest, i cili nuk përfshin ambasadën amerikane, shprehu shqetësimin për ndalimin e paradës së krenarisë, për të cilën ata thanë se “rezulton në kufizime në të drejtën për tubim paqësor dhe lirinë e shprehjes”.
Organizatorët e paradës së krenarisë thanë se ngjarja nuk paraqet rrezik për fëmijët dhe se planifikojnë ta mbajnë atë pavarësisht ndalimit.