Një 53-vjeçar i shpallur në kërkim ndërkombëtar nga autoritetet italiane është arrestuar në Shijak, në kuadër të një operacioni policor të zhvilluar nga Policia e Shtetit. Bëhet fjalë për shtetasin F.K., banues në Shijak, i cili ishte dënuar në Itali me 9 vite burg për përfshirje në veprimtari kriminale të lidhura me narkotikët dhe shfrytëzimin e prostitucionit.
Sipas njoftimit zyrtar të Policisë, arrestimi u realizua gjatë operacionit të koduar “Decision”, i cili u finalizua nga specialistët e Seksionit për Hetimin e Narkotikëve, në bashkëpunim me Komisariatin e Policisë Shijak dhe Forcat Operacionale të DVP Durrës. Operacioni erdhi si rezultat i punës intensive për gjurmimin dhe lokalizimin e personave në kërkim, si dhe i informacioneve të siguruara në rrugë operative.
“Gjatë operacionit u bë e mundur lokalizimi, kapja dhe arrestimi i përkohshëm, me qëllim ekstradimi, i shtetasit F.K., 53 vjeç”, njofton Policia e Shtetit.
Ky shtetas ishte shpallur në kërkim ndërkombëtar, pasi Gjykata e Apelit e Torinos, në vitin 2023, e ka dënuar me 9 vite burg për veprat penale të “Trafikimit të lëndëve narkotike”, “Pjesëmarrjes në organizatë kriminale” dhe “Shfrytëzimit të prostitucionit”, të parashikuara nga Kodi Penal italian.
Autoritetet policore bëjnë me dije se materialet procedurale janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Durrës, me qëllim vijimin e procedurave ligjore për ekstradimin e 53-vjeçarit drejt Italisë.
Policia thekson se bashkëpunimi me autoritetet partnere ndërkombëtare do të vijojë intensivisht, me synim goditjen e grupeve kriminale dhe vënien përpara drejtësisë të personave të dënuar apo të kërkuar për vepra të rënda penale.