Një valë e zgjatur të ftohti ekstrem ka shkaktuar humbjen e jetës së 18 personave në qytetin e New Yorkut, kanë njoftuar autoritetet lokale. Që nga fundi i muajit janar, qyteti është përballur me temperatura shumë të ulëta, duke shënuar 13 ditë radhazi me temperatura 0°C ose më poshtë, një nga periudhat më të gjata të motit nën zero të regjistruara në gjashtë dekadat e fundit.
Gjatë fundjavës, një tjetër person humbi jetën në rrugët e qytetit. Kryetari i bashkisë, Zohran Mamdani, deklaroi të hënën se çdo jetë e humbur është një tragjedi dhe shtoi se autoritetet do të vazhdojnë të jenë pranë familjeve të viktimave në këto momente të vështira.
Edhe pse temperaturat pritet të rriten gradualisht gjatë kësaj jave, ato do të mbeten ende nën mesataren sezonale. Kryebashkiaku u bëri thirrje banorëve që të tregojnë kujdes maksimal. “Qëndroni të sigurt, qëndroni brenda banesave sa më shumë të jetë e mundur dhe kujdesuni për njëri-tjetrin”.
Që nga 19 janari, kur u shpall gjendja emergjente “Code Blue”, e cila lehtëson rregullat e pranimit në strehimoret për të pastrehët, rreth 1,400 persona janë sistemuar në strehimore. Gjithashtu, qyteti ka shtuar 64 dhoma hoteli në kapacitetin e strehimit dhe ka angazhuar të paktën 150 punonjës shtesë në terren për të ndihmuar personat në nevojë.
Sipas deklaratave të bëra më 27 janar, të paktën 10 nga viktimat u gjetën në ambiente të hapura, ndërsa rrethanat e vdekjeve të tjera mbeten ende të paqarta. Autoritetet theksuan se përpjekjet për të mbajtur qytetarët të sigurt do të vazhdojnë, veçanërisht pasi temperaturat nuk pritet të kalojnë mbi 0°C deri në ditët në vijim.
Shërbimi Kombëtar i Motit i SHBA-së njoftoi se temperaturat do të arrijnë rreth 0°C gjatë javës, ndërsa normalisht për këtë periudhë të vitit ato janë rreth 4°C. Një masë ajri arktik ka sjellë erëra shumë të ftohta, duke rritur rrezikun për hipotermi dhe ngrirje të lëkurës.
Megjithëse seria 13-ditore e temperaturave nën zero përfundoi të premten, Agjencia e Menaxhimit të Emergjencave në New York paralajmëroi se rreziqet mbeten të larta. Ajo bëri thirrje për kujdes nga dëbora dhe akulli që mund të shkëputen nga ndërtesat pa paralajmërim, si dhe nga rrugët dhe trotuaret që mund të ngrijnë sërish gjatë natës.