Një qytetar nga Përmeti, është i pari emigrant i ardhur nga jashtë kufirit gjatë procesit të riatdhesimit që ka rezultuar pozitiv me COVID-19. I riatdhesuari nga Greqia përmes pikës kufitare të Kakavijës më 16 prill është karantinuar në një hotel në Grykën e Këlcyrës, ku ndodhen një grup prej 26 emigrantësh. Ai ka shfaqur simptoma, ku pas marrjes së tamonit analiza e kryer në laboratorin e ISHP-së rezultoi pozitive.
Ky është rasti konkret – tha kryeministri Edi Rama – se nëse qeveria nuk do të kishte bërë me detyrim karantinimin 14 ditë në hotele për shqiptarët e riatdhesuar, bilanci i të infektuarve do të ishte shumë herë më i larë.
“Do të kishim një vatër të re infeksioni, do e përhapte në gjithë Përmetin. Ku ka kryeministër në botë që do të dojë t’i shtojë vetes së vetë halle kaq të mëdha sa halli i kësaj situate dhe halli i të qeni në shënjestër për sharje dhe mallkime. Dakord. më thoni ça të doni, i gëlltisë të gjitha”, tha Rama.
Nuk dihet ende se çfarë do të ndodhë me emigrantit, nëse do të izolohet në një dhomë të veçantë në hotel, apo nëse do të merret vendim për t’u dërguar në karantinën shtetërore në Konvaleshencën në Durrës. Po ashtu, nga ISHP pritet t’u merren tamponë personave të kontaktit.
Emigranti shënon rastin e parë të të infektuarve me COVID-19 në qarkun e Gjirokastrës.