Nuk ka qenë një diskutim i qetë ai mes aktorit të njohur Igli Zarka dhe kryetarit të jurisë në ‘Dance Albania’, Ilir Shaqiri. Vlerësimet e këtij të fundit për kërcimin e javës së kaluar e kanë zemëruar aktorin për përzgjedhjen e fjalëve para se të jepte pikët për të. Sipas Iglit, Iliri, si profesionist, mund të zgjidhte fjalë më profesionale për ta specifikuar kërcimin e tij (dhe jo kërcim ‘I ngordhur’, siç tha Iliri).
Nga ana e tij, Ilir Shaqiri ka kritikuar Iglin duke i thënë se ai nuk di ta vërë veten në lojë.
“Unë nuk luaj me veten. Ti mund të jesh mësuar të luash me veten, unë jo!”,- iu drejtua Igli Ilirit, pa e fshehur tensionin në fjalët e tij.
Megjithatë, votimi i jurisë e çoi Iglin në sfidë me një tjetër çift të zgjedhur nga vetë artistët pjesëmarrës në garë. Pas sfidës, juria vendosi që gara të përfundojë për Iglin, por Iliri nuk mund të rrinte pa i dhënë Iglit edhe një mesazh të fundit aktorit: ‘Tregove veten, edhe në kërcimin e fundit, megjithëse më pëlqeve, preferoj që garën ta vazhdojë Cindy’.