Gara për përzgjedhjen e drejtorit të Përgjithshëm të Policisë ka përfunduar, dhe propozimi i ministrit të Brendshëm, Ervin Hoxha për emrin e preferuar është Ilir Proda dhe vendimi i qeverisë ”Rama 3” për këtë kandidaturë do të merret në mbledhjen e radhës. Proda është drejtori aktual i Drejtorisë së Policisë së Elbasan, me një eksperiencë shumë vjeçare në radhët e policisë së shtetit, Ilir Proda plotëson të gjitha kriteret.
Emri i drejtorit të ri të Policisë së Shtetit shkaktoi gjithashtu gjithë këto ditë shqetësim edhe te partnerët ndërkombëtarë, të cilët kërkojnë një figurë të pastër dhe të pa lidhur me korrupsionin. Mësohet se ekspertë të huaj zhvilluan takime me ministrin e Brendshëm, Ervin Hoxha.
Në total në garë morën pjesë 15 kandidatë, nga të cilët vetëm 11 morën pjesë në intervistimin e komisionit të posaçëm, gjatë javës së kaluar. Në komisionin e vlerësimit bënin pjesë zv.ministri i Brendshëm, Besfort Lamallari, Sekretarja e Përgjithshme e Ministrisë së Brendshme, Suzana Hoxha dhe drejtuesi i Agjencisë së Mbikëqyrjes Policore, Florian Sulejmani. Ditën e premte 27.09.2024, Komisioni i Posaçëm i dorëzoi në bazë të ligjit Ministrit të Brendshëm listën me 5 kandidatët më të vlerësuar, paraqitur si më poshtë sipas rendit alfabetik:
- Z. Altin Mena
- Z. Ardian Çipa
- Z. Ilir Proda
- Z. Neritan Nallbati
- Z. Skënder Hita