Deputetja e Partisë Demokratike Ina Zhupa ka reaguar në lidhje me ndarjen nga jeta të 22-vjeçarit Armando Kazma, i cili ndërroi jetë nga shembja e kalçetos gjatë stuhisë në qytetin e Sarandës. 22-vjeçari rezulton të jetë një aktivist i Partisë Demokratike, me të cilin deputetja Zhupa ka ndarë momente gjatë fushatës elektorale.
Përmes një postimi në facebook, deputetja e PD-së shpreh dhimbjen për ndarjen nga jeta të 22-vjeçarit dhe shpreh ngushëllimet për familjarët dhe miqtë.
Postimi në Facebook
Nuk dua ta besoj, nuk doja ta shkruaja kurrë këtë status, dhimbje pafund.
Një nga djemtë më të mirë të Sarandës, një djalë i zoti, një djalë i qeshur, punëtor, i pari në fushatën elektorale në krye të punëve, i fundit u largua deri sa numëroi votën e fundit.
Një djalë i shkolluar, një djalë i urtë, nga një familje e jashtëzakonshme.
Edhe të gjitha këto janë pak për të përshkruar Armandon që sapo mora vesh që u nda nga jeta në moshën 22 vjecare, aksidentalisht nga një shtyllë kalçeto që u rrëzua nga stuhia me shi.
O zot jepi forcë familjes së tij për këtë dhimbje të papërshkrueshme, jepi forcë njerëzve të afërt.
I paharruar Armando, lotët nuk do thahen kurrë për ty. Parajsa ka engjëllin e vet, ne kemi dhimbjen që po na plas zemrën.
Do të mbaj mend të qeshur gjithmonë.