Vetëm atletet vajza biologjike, gjinia e të cilave do të përcaktohet nga një test i vetëm për shqyrtimin e gjeneve, do të marrin pjesë në garat e kategorisë së femrave në Lojërat Olimpike.
Ky është vendimi i marrë nga Komiteti Olimpik Ndërkombëtar, që konfirmoi se të gjitha atletet që synojnë të garojnë në kategorinë e femrave në Lojërat Olimpike duke nisur nga edicioni i ardhshëm do t’i nënshtrohen testit gjenetik SRY, i cili përdoret për të identifikuar praninë e një gjeni të lidhur me zhvillimin seksual mashkullor. IOC theksoi se ky test konsiderohet një tregues i qëndrueshëm dhe i saktë shkencor për përcaktimin e gjinisë biologjike.
Ky ndryshim vjen si pjesë e përpjekjeve të Komitetit Olimpik Ndërkombëtar për të vendosur një standard të unifikuar global, pas viteve të politikave të fragmentuara që kanë shkaktuar debat dhe polemika në sportet elitare të femrave. Në vitin 2021, organi qeverisës olimpik kishte deleguar përgjegjësinë tek federatat ndërkombëtare për të hartuar rregullat e tyre, duke shmangur një qasje të përbashkët.
Rregullat e reja nuk do të kenë fuqi prapavepruese dhe nuk do të ndikojnë në sportet amatore apo ato në nivel bazë. Deri më tani, atletët transgjinorë lejoheshin të konkurronin në bazë të rregullave të federatave përkatëse. Megjithatë, vetëm një numër i kufizuar atletësh të deklaruar hapur si transgjinorë kanë marrë pjesë në Lojërat Olimpike. Një prej rasteve më të njohura ishte peshëngritësja nga Zelanda e Re, Laurel Hubbard, e cila garoi në Lojërat Olimpike të Tokios në vitin 2021.
Vendimi i IOC-së vjen në një kontekst më të gjerë debatesh ndërkombëtare mbi pjesëmarrjen e atletëve transgjinorë në sport. Në Shtetet e Bashkuara, presidenti Donald Trump ka ndërmarrë hapa të ngjashëm, duke kufizuar pjesëmarrjen e tyre në garat e femrave në nivele të ndryshme.
Çështja u vu gjithashtu në qendër të vëmendjes gjatë Lojërave Olimpike të Parisit 2024, veçanërisht në garat e boksit për femra, ku pati polemika mbi kriteret e pranueshmërisë së disa sportisteve. Me këtë vendim, Komiteti Olimpik Ndërkombëtar synon të mbyll boshllëqet rregullatore dhe të krijojë një kornizë të qartë për të ardhmen e garave të femrave në arenën olimpike.