Dritan Goxhaj ka kallëzuar në SPAK ministrin e Drejtësisë Ulsi Manja, kjo për shpërdorim detyre. Kallëzimi është bërë ditën e djeshme nga Dritan Goxhaj, ish-anëtar i UÇK. Kallëzimi në fjalë është bërë lidhur me procedurat dhe pranimin e kërkesave të Gjykatës Speciales të Kosovës për ekstradimin e Goxhajt kur u arrestua.
Dritan Goxhaj u arrestua me qëllim ekstradimin drejt Hagës i akuzuar për krime lufte, u lirua nga Gjykata e Apelit. Ish-luftëtari i UÇK-së ngriti akuzat ndaj ministrit Manja lidhur me procedurat dhe pranimin e kerkesave te Gjykates Speciales të Kosovës per ekstradimin e tij.
Në padinë e ngritur, Goxhaj shprehet se “Ulsi Manja jo vetëm si Ministër i Drejtësisë por edhe si Deputet i Parlamentit Shqiptar ka dijeni të plotë se Parlamenti Shqiptar nuk ka ratifikuar dhe as e ka bërë ndonjëherë pjesë së marrëveshjes së ekstradimit me Kosovën, Ligjin Special mbi të cilin janë ngritur Dhomat Speciale të Kosovës”.
Ai akuzon ministrin e Drejtësisë se në funksion të detyrës së tij ka vepruar në kundërshtim me ligjet. “Neni 11 i Kodit Penal sanksionin se ekstradimi nuk lejohet: Në qoftë se vepra penale që përbën objektin e kërkesës për ekstradim ka një karakter politik ose ushtarak”, shkruhet në Padi.