Ish-kryeministri Sali Berisha njoftoi sot nga ‘Foltorja’ e Beratit mbledhjen e më shumë se 50% të kourumit të nevojshëm për të thirrur Kuvendin Kombëtar.
Ish-deputeti demokrat Aldo Bumçi e quajti një lajm të mirë, pasi nisma e Berishës që nisi në një periudhë kur Partia Demokratike ishte në një situatë të tensionuar, arrit t’i japë më shumë besim demokratëve të vendit.
Bumçi nënvizon se Berisha arriti të kthejë shpresë në mesin e qytetarëve të pakënaqur dhe të zhgënjyer duke rikthyer edhe njëherë atmosferën e vitit 2005.
“Është një lajm shumë i mirë. Po ta mendosh se kur u nis si lëvizje cila ishte gjendja në PD pas humbjes së zgjedhjeve e cila përfshiu një dëshpërim jo vetëm ne po edhe socialistët që na votuan, pjesë të shoqërisë që prisnin me padurim ndryshimin që ne nuk arritëm ta sillnim. Por mbas kësaj goditje erdhi më tej një sjellje e paimagjinueshme, një vendim i pa besueshëm derisa ndodhi që ishte largimi I zotit Berisha, braktisja e betejës opozitare, lënja e masakrës zgjedhore edhe pse me një raport shumë kritik të zgjedhjeve të ODIHR për patronazhistët, por Basha nuk i përdori por erdhi goditja e zërit më të fuqishëm opozitar liderit historik. Çfarë çoi dhe në prekjen e fundit pasi opozita u gjend e pashpresë. I vetëm Berisha nuk e bën dot por ato salla janë mbushur nga demokratët. Berisha me besimin që u ka dhënë demokratëve dhe qytetarëve të këtij vendi, pasi ndryshe Facebook-u i tij nuk do kthehej institucioni më i besueshëm në këtë vend, arriti të ngjiste shumë shpejt dhe e ktheu pakënaqësinë në shpresë dhe kemi një ndryshim atmosfere në PD si në vitin 2005. Njerëzit duan shpresë dhe atë e gjetën në këto takime,” u shpreh Bumçi.