Ish-Presidenti Alfred Moisiu i ka dhënë një mesazh Ilir Metës, teksa e rekomandon këtë të fundit të mos bëhet palë por të debatojë në respektimin dhe në kërkesën për respektimin e kushtetutës.
“Përfaqësojnë unitetin e kombit dhe unitetin e kombit nuk mund ta përfaqësosh nëse bëhesh palë ose merr pjesë në debatet e ndryshme politike.
Presidenti bën debate kushtetuese për mbrojtjen e kushtetutës dhe interesave të vendit. Unë u përpoqa të jep një shembull, të cilin e ndjek sipas experiencës”, është shprehur ai për Ora News!
Ceremonia e vlerësimit
Ish-Presidenti i Republikës, Alfred Moisiu u nderua këtë të premte me titullin “Nderi i Qarkut” nga Këshilli i Qarkut Tiranë. Titull që iu dorëzua nga kryetari i Këshillit të Qarkut Tiranë, Aldrin Dalipi.
“Në shenjë vlerësimi të lartë, për kontributin e çmuar në shoqërinë tonë duke qenë shembull frymëzimi për vlerat e qytetarisë, shtetit të së drejtës dhe shërbimi ndaj atdheut“, shkruhej në motivacionin që Dalipi akordoi për nder të ish-presidentit.
I emocionuar nga ceremonia Presidenti Moisiu falënderoi kryetarin e Këshillit të Qarkut dhe ia dedikoi atë vlerësim familjes dhe miqve të cilët e mbështetën atë gjatë karrierës së tij të gjatë.
“Ata që nuk vlerësojnë kontributin e të parëve të tyre janë shkatërruesit e kombit të tyre. Dua ta falënderoj zotin Dalipi që po bën një punë të mirë për të vënë në vend dhe për të përkujtuar vlerat e atyre njerëzve që kanë kontribute” u shpreh Moisiu.
“Roli i tij në historinë moderne të Shqipërisë është padyshim një shembull dhe inkurajim duke shtuar dhe kontributin i tij të çmuar gjatë luftës Antifashiste Nacional çlirimtare. Vendosmëria e tij për një shtet të së drejtës, por dhe për proceset integruese në aleancës euroatlantike janë dhe do të mbeten një vlerë e padiskutueshme” u shpreh Dalipi gjatë fjalës së tij.
Në këtë ceremoni nderimi morën pjesë zv.ministri i Mbrojtjes Petro Koçi, Shefi i Shtabit të Ushtrisë, gjeneral Bardhyl Kollçaku, Prefektja e Qarkut Tiranë Suzana Jahollari, nënkryetari i Bashkisë Tiranë Andi Seferi, kryetarët e bashkive të Qarkut, familjarë, miq, të afërm dhe dashamirës të z.Moisiu.