Mes njerëzve që i dhanë lamtumirën Kiço Blushit ishte dhe ai, aktori që e duam të gjithë e që me pak fjalë tha shumë për mikun që humbi.
Robert Ndrenika kishte një marrëdhnënie të ngushtë me Kiçon, që kishte nisur që në vitet studentore e që më pas ishte forcuar edhe profesionalisht. Së fundmi, ata takoheshin bashkë çdo ditë me një grup shokësh e Ndrenikë teksa e përcillte për në banesën e fundit, tha këto fjalë:
“Njerëzit kanë vëllezër, kanë marrëdhënie të mira me ta, mirëpo ka edhe fjalë të tjera të mençura që i njohim të gjithë, ‘vëlla e shkuar vëllait’, duhet të jenë thënë për raste si këto. Kiço Blushi ishte miku dhe vëllai im, me të cilin ndaja gjithçka. Njerëzit e afërt, qoftë edhe familjarët e tu, i do fort, por mund të jetojnë larg teje e për rrjedhojë nuk je aq i afërt sa ç’je me atë që të bëhet mik. Ishim gjithë kohën bashkë, në dalje të përditshme. Takimi ynë i fundit ishte në ditët e tij të fundit, kur shkova ta shija në spital”.
Kiço Blushi u nda nga jeta këtë të shtunë në moshën 75-vjeçare. Shkrimtar dhe skenarist mjaft i njohur që ka shkruar batutat më të bukura të filmave që do të mbahen mend gjatë.