Autoritetet izraelite pritet të avancojnë planet për ndërtimin e 9,000 njësive të reja të banimit, në një vendbanim të paligjshëm, në vendin e aeroportit të braktisur Qalandiya në Jerusalemin Lindor të pushtuar.
Projekti, i njohur si lagjja Atarot do të diskutohet dhe të miratohet nga Komiteti Rajonal i Planifikimit dhe Ndërtimit, sipas grupit izraelit Peace Now. Vendbanimi është parashikuar brenda një zone urbane palestineze, duke u shtrirë nga Ramallahu në Bregun Perëndimor deri te kampi i refugjatëve Qalandiya dhe qytete të tjera. Kjo do të krijojë një enklavë izraelite në mes të qindra mijëra palestinezëve, duke penguar zhvillimin e zonës dhe mundësinë e një shteti të pavarur palestinez.
Peace Now e ka cilësuar këtë plan si shkatërrues dhe një pengesë për lidhjen e Jerusalemit Lindor me zonat palestineze përreth. Qeveria e kryeministrit Benjamin Netanyahu po përdor çdo moment për të minuar mundësitë për paqe dhe kompromis. Planet filluan që në vitin 2020 dhe u përgatitën nga Bashkia e Jerusalemit, megjithëse hasën kundërshtime nga Ministritë e Mjedisit dhe Shëndetësisë.
Administrata e ish-presidentit amerikan Barack Obama gjithashtu ishte kundër këtij projekti. Shumica e zonës konsiderohet “tokë shtetërore” nga Izraeli, duke shmangur nevojën për leje nga pronarët palestinezë. Në të njëjtën kohë, Izraeli ka avancuar me projekte të tjera të vendbanimeve të paligjshme dhe po ndjek aneksimin e Bregut Perëndimor. Kabineti i sigurisë izraelite miratoi javën e kaluar formalizimin e 19 vendbanimeve të paligjshme, raporton Al Jazeera.
Forcat izraelite po vazhdojnë bastisjet dhe arrestimet në Bregun Perëndimor. Operacione për prishje banesash u ndërmorën këtë të mërkurë, 17 dhjetor në qytetin Biddu, për arsye të mungesës së lejeve. Në Ein Yabrud, kolonët dogjën makina palestineze dhe shkruan slogane raciste.
Janë arrestuar edhe disa palestinezë gjatë bastisjeve në Nablus. Autoritetet lokale njoftuan se ushtarakët izraelitë planifikojnë të rrënojnë 25 ndërtesa banimi në kampin e refugjatëve Nur Shams këtë javë. Ky plan është pjesë e një strategjie më të gjerë, që minon mundësitë për shtet palestinez.